പിഴക്കാത്ത ആസൂത്രണമുള്ള ദൈവം

കഫർണാമിൽ വെച്ച് ദേവാലയ നികുതി പിരിക്കുന്നവർ പത്രോസിനോട് ചോദിച്ചു: "നിങ്ങളുടെ ഗുരു ദേവാലയ നികുതി കൊടുക്കുന്നില്ലേ?" ​ഈ ചോദ്യം അറിഞ്ഞ ഈശോ, പത്രോസിനോട് പറയുന്നത് ഒരു അത്ഭുതകരമായ കാര്യമാണ്:

​"എങ്കിലും അവർക്കു ഇടർച്ചയുണ്ടാകാതിരിക്കാൻ നീ കടലിൽ ചെന്നു കടലിൽ പോയിചൂണ്ടയിടുക; ആദ്യം ലഭിക്കുന്ന മത്സ്യത്തിന്റെ വായും തുറക്കുമ്പോൾ ഒരുനാണയം കണ്ടെത്തും.അതെടുത്ത് എനിക്കും നിനക്കും വേണ്ടി അവർക്കു കൊടുക്കുക." (മത്തായി 17:27)

​ഈ ഒരൊറ്റ സംഭവത്തിൽ ഈശോ നമുക്ക് വ്യക്തമാക്കുന്നത് പ്രപഞ്ചത്തിന്റെ മുഴുവൻ നിയന്ത്രണവുമുള്ള, ഏറ്റവും മികച്ച മാനേജ്‌മെന്റ് വിദഗ്ദ്ധനായ ക്രിസ്തുവിന്റെ ഒരിക്കലും പിഴക്കാത്തതും അതിസൂക്ഷ്മമായ ആസൂത്രണവും കരുതലുമാണ്. ​ പരന്ന കടലിലെ കൃത്യമായ കണക്കുകൂട്ടൽ ​ഗലീലിയാക്കടൽ എത്രയോ വിശാലമാണ്! ആയിരക്കണക്കിന് മത്സ്യങ്ങൾ നീന്തിത്തുടിക്കുന്ന ആ മഹാസമുദ്രത്തിലേക്ക് വലവീശാനല്ല ഈശോ പത്രോസിനോട് ആവശ്യപ്പെട്ടത്. പകരം, ഒരു ഒറ്റ ചൂണ്ടയിടാനാണ്.

​കൃത്യമായ കാഴ്ചപ്പാട്:
ആ വിശാലമായ കടലിലെ ഏത് മീനാണ് ചൂണ്ടയിൽ കൊത്താൻ പോകുന്നതെന്ന് ഈശോയ്ക്ക് അറിയാമായിരുന്നു.
​കൃത്യമായ സമയം:
ആ മീനിന്റെ വായിൽ നികുതി നൽകാനുള്ള ശരിയായ തുക അടങ്ങിയ നാണയം ഉണ്ടാകുമെന്നും, അത് പത്രോസ് ചൂണ്ടയിടുന്ന കൃത്യസമയത്ത് അവിടെയെത്തുമെന്നും അവിടുന്ന് നേരത്തെ കണക്കുകൂട്ടിയിരുന്നു!

​മനുഷ്യന്റെ ബുദ്ധിക്കും യുക്തിക്കും അപ്പുറത്തുള്ള കൃത്യതയും മാനേജ്‌മെന്റ് നൈപുണ്യവുമാണ് ഇവിടെ പ്രകടമാകുന്നത്. ​നമ്മെക്കുറിച്ചും നമ്മുടെ മക്കളെക്കുറിച്ചുമുള്ള ദൈവീക സൂക്ഷ്മത ​ഇന്നത്തെ കാലഘട്ടത്തിൽ അനുദിന ജീവിതച്ചെലവുകൾ, കടബാധ്യതകൾ, തൊഴിൽ പ്രശ്നങ്ങൾ, അതിലുപരി മക്കളുടെ ഭാവി, അവരുടെ പഠനം, വിവാഹം എന്നിവയെയൊക്കെ ഓർത്ത് ടെൻഷനടിക്കുന്ന മാതാപിതാക്കളാണ് ഭൂരിഭാഗവും. എന്നാൽ ഈ സുവിശേഷ ഭാഗം നമ്മോട് ഉറപ്പിച്ചു പറയുന്നത് ഇതാണ്: നമ്മെയും നമ്മുടെ മക്കളെയും കുറിച്ച് ദൈവത്തിന് കൃത്യമായ പദ്ധതിയും സൂക്ഷ്മതയുമുണ്ട്.
​ആശങ്കകൾക്ക് സ്ഥാനമില്ല:
വിശാലമായ കടലിലെ ഒരു ചെറിയ മീനിന്റെ വായിലെ നാണയത്തിന്റെ അളവ് വരെ കൃത്യമായി അറിയുന്ന ദൈവത്തിന്, നമ്മുടെ ജീവിതത്തിലെ ആകുലതകളുടെ വ്യാപ്തി അറിയില്ലേ?
​ആവശ്യങ്ങൾ അറിയുന്ന പിതാവ്:
നമ്മുടെേയും മക്കളുടെയും ജീവിതത്തിൽ എപ്പോൾ, എത്ര, എങ്ങനെ നൽകണം എന്ന് അവിടുന്ന് മുൻകൂട്ടി നിശ്ചയിച്ചിട്ടുണ്ട്. നമ്മൾ ചെയ്യേണ്ടത് അവിടുത്തെ വാക്കിന് അനുസരണമായി ചൂണ്ടയിടുക (പ്രവർത്തിക്കുക) മാത്രമാണ്.
​മക്കളെക്കുറിച്ചുള്ള കരുതൽ:
നമ്മുടെ മക്കളുടെ കഴിവുകൾ, അവരുടെ ജീവിതവഴികൾ, അവർ നേരിടുന്ന സങ്കീർണ്ണതകൾ എന്നിവയെല്ലാം ദൈവീക കമ്പ്യൂട്ടറിൽ അതിസൂക്ഷ്മമായി രേഖപ്പെടുത്തപ്പെട്ടിരിക്കുന്നു. ​അവിടുത്തെ കരങ്ങളിൽ ഭാരങ്ങൾ ഇറക്കിവെക്കാം. നാം പ്രാപിക്കേണ്ടത് ഈ ശരണാഗതത്വമാണ്. ദൈവം ഒരു വിഫല ആസൂത്രകനല്ല. ഓരോ മനുഷ്യജീവിതത്തെക്കുറിച്ചും അവിടുത്തേക്ക് വ്യക്തമായ 'ബ്ലൂപ്രിന്റ്' ഉണ്ട്.

​ മാറ്റി വിശ്വാസം നിറയ്ക്കുക:
നമ്മൾ സ്വയം കാര്യങ്ങൾ ആസൂത്രണം ചെയ്ത് ഭാരപ്പെടുമ്പോഴാണ് ടെൻഷനും നിരാശയും ഉണ്ടാകുന്നത്. ഭരണം ദൈവത്തിന് വിട്ടുകൊടുക്കുക.
​അനുസരണയുള്ള കാത്തിരിപ്പ്:
പത്രോസ് ചോദ്യം ചെയ്യാതെ പോയി ചൂണ്ടയിട്ടതുപോലെ, ദൈവവചനത്തിലും ദൈവീക പ്രരണകളിലും ഉറച്ചുനിന്ന് അനുദിന കടമകൾ ചെയ്യുക. ബാക്കി കാര്യങ്ങൾ ദൈവീക സമയത്ത് അത്ഭുതകരമായി നിവർത്തിയാകും.

​ ആകാശത്തിലെ പറവകളെയും വയലിലെ ലില്ലികളെയും പരിപാലിക്കുന്ന, കടലിലെ മത്സ്യത്തെപ്പോലും തന്റെ പദ്ധതിക്കായി ഉപയോഗിക്കുന്ന മാനേജ്‌മെന്റ് വിദഗ്ദ്ധനായ ഒരു കർത്താവാണ് നമുക്കുള്ളത്. അങ്ങനെയെങ്കിൽ നാമെന്തിനാണ് ആശങ്കപ്പെടുന്നത്? നമ്മെയും നമ്മുടെ കുടുംബത്തെയും മക്കളെയും അവിടുത്തെ അതിസൂക്ഷ്മമായ കരുതലിലേക്ക് പൂർണ്ണമായി സമർപ്പിക്കാം. നമുക്ക് പ്രാർത്ഥിക്കാം: ദൈവമേ അങ്ങയെ പരിപൂർണ്ണമായി ഞങ്ങളെ പഠിപ്പിക്കേണമേ.

(2026 സെപ്റ്റംബർ - ജീവജ്വാല മാസികയിൽ പ്രസിദ്ധീകരിച്ച ലേഖനം)